મૂવી રિવ્યુઃ શરતો લાગુ

96
Loading...

શરતો લાગુ

રેટિંગ: ૪/૫ 

ડિરેક્ટર: નીરજ જોશી

ડ્યૂરેશન: 2 કલાક 17 મિનિટ

ફિલ્મનો પ્રકાર: ડ્રામા, રોમાન્સ, કોમેડી

ભાષા: ગુજરાતી

સ્ટોરીઃ

સાવિત્રી (દીક્ષા જોશી) પ્રાણીઓની ડોક્ટર છે જ્યારે સ્તયવ્રત (મલ્હાર ઠાકર) એક એન્જિનિયર અને આંત્રપ્રોન્યોર છે. બંનેની પર્સનાલિટી વચ્ચે આભ જમીનનું અંતર છે. તેમના પર પરિવાર દ્વારા સતત લગ્ન કરવાનું દબાણ થયા કરે છે. જો કે બંનેને ડાઉટ હોવાથી લગ્ન કરતા પહેલા બે મહિના સુધી બંને સાથે રહેવાનું નક્કી કરે છે અને તેમના આ નિર્ણયથી પરિવારમાં ધમાસાણ મચી જાય છે. એકબીજાથી સાવ જ જુદા સાવિ અને સત્યા છેવટે પરણશે કે કેમ?

રિવ્યુઃ

આ ફિલ્મ 2017માં રીલીઝ થયેલી મરાઠી ફિલ્મ ચિ વા ચિ સૌ કા પર આધારિત છે. હરિશ્ચનદ્રા ચિ ફેક્ટરી, એલિઝાબેથ એકાદશી જેવી વખણાયેલી ફિલ્મો બનાવનાર ડિરેક્ટર પરેશ મોકાશીએ આ મરાઠી ફિલ્મ બનાવી હતી. આ ફિલ્મના કથાવસ્તુને પકડી રાખીને ફિલ્મના લેખકો મિતાઈ શુક્લા ને નેહલ બક્ષીએ ખૂબ જ કલાત્મક રીતે ફિલ્મને ગુજરાતી ટચ આપતો સ્ક્રીનપ્લે તૈયાર કર્યો છે. આ કારણે ફિલ્મ સીધી ગુજરાતી દર્શકોને સ્પર્શી જાય છે. ડિરેક્ટર નીરજ જોશીની અગાઉની ફિલ્મ કેશ ઓન ડિલિવરી દર્શકોને આકર્ષવામાં નિષ્ફળ ગઈ હતી પરંતુ આ ફેમિલી-ડ્રામામાં તેમણે કમાલનું કામ કર્યું છે. ફિલ્મનું ડિરેક્શન સરસ છે, એડિટિંગ પણ કમાલનું છે અને લોકેશન્સ નયનરમ્ય છે. પાર્થ ભરત ઠક્કરનું મ્યુઝિક પણ વખાણવાલાયક છે. પંખી રે અને મન મેળો ગીત તો એવા છે કે ફિલ્મ પતે પછી પણ તમારા દિમાગમાં ચાલ્યા કરે.

પરફોર્મન્સઃ

ફિલ્મના પાત્રો જીવંત અને મજબૂત છે. દરેક પ્રાણીઓ સાથે સાવિને વાત કરતી જોવાની તમને મજા પડશે. એથી વિરુદ્ધ પાણીનું એક એક ટીપુ બચાવવા મથતા સત્યાને જોઈને પણ તમને કૌતુક થશે. મલહાર અને દીક્ષાની સ્ક્રીન પર કેમિસ્ટ્રી જામે છે. પણ તે એક વાર પ્રેમમાં પડે પછી તેમના સંબંધોમાં જે પેશન હોવુ જોઈએ તે ફિલ્મમાંથી ગાયબ છે. કેટલીક જગ્યાએ ઓવરએક્ટિંગ પણ જોવા મળે છે. તમે સત્યાની દાદીનો રોલ નિભાવતા ગોપી દેસાઈના પ્રેમમાં પડી જશો. આખી ફિલ્મમાં સૌથી કૂલ અને તરવરિયુ પાત્ર છે દાદીનું. તે YOLO (યુ ઓન્લી લિવ વન્સ)ની થિયરીમાં માને છે, સોશિયલ મીડિયા પર સક્રિય રહે છે અને તેના બોયફ્રેન્ડ સાથએ લગ્ન કરવા માટે ભાગી પણ જાય છે. હેમંત ઝા, પ્રશાંત બારોટ, અલ્પના બુચ અને છાયા વોરા પેરેન્ટ્સના રોલમાં જામે છે. સાવિના ટીનેજ ભાઈ ટિનિયાનું પાત્ર પણ સારુ છે. તે તેના પિતાને પોતાના પ્રેમ વિષે સમજાવતા જ્યારે કહે છે- “ક્યા કરે યે કમ્બખ્ત ચીઝ હી એસી હે” ત્યારે તમે ખડખડાટ હસવાનું રોકી નહિ શકો.

ફિલ્મ જોવા જેવી છે કે નહિ?

ફિલ્મમાં અનેક ફની ડાયલોગ્સ છે. જેવા કે લફડુ વિથ રિસ્પેક્ટ એટલે રિલેશનશીપ, ચિકન સૂપના પારણા, વધારેમાં વધારે શું થાય, છોકરો કે છોકરી વગેરે તમને પેટ પકડીને હસાવશે. ફિલ્મ સારી બની છે પણ છેલ્લે અડધો કલાક ખેંચાતો હોય તેવુ લાગે. છેલ્લા ભાગમાં થોડા વધારે સારા ડાયલોગ્સ હોત તો મજા આવત. જે દર્શકો વધુ સારી ગુજરાતી ફિલ્મો જોવા માંગે છે તેમણે આ ફિલ્મ જરૂર જોવી જોઈએ.

આ પણ વાંચો : ઉનાળો નહીં, શિયાળા પહેલા જ દુષ્કાળના ડાકલાંઃ ખેતીની સિંચાઈ માટે 12000 ક્યુસેક નર્મદાનું પાણી છોડાશે

તમને કદાચ ગમશે

Loading...