દિવાળી નજીક હોવા છતાં દુકાનદારો નવરાધૂપ! : જાણો કારણ

72
Loading...

રિટેલ માર્કેટમાં વેચાણ ઘટ્યું

સામાન્ય રીતે તહેવારો નજીક આવતાં બજારો ખરીદદારોથી ઊભરાવવા લાગે છે. ઘર સજાવટની વસ્તુઓથી શરૂ કરીને કપડાં સુધીની ખરીદી માટે લોકો રિટેલ સ્ટોર્સમાં પહોંચી જાય છે. પરંતુ આ વખતે તહેવારોની સિઝનમાં રિટેલની દુકાનોમાં ચિત્ર કંઈક અલગ છે. ગાર્મેન્ટના ઉત્પાદકો અને વિક્રેતાઓનું અનુમાન છે કે આ વર્ષે વધતો ફુગાવો, લોકોની ઘટતી ખરીદશક્તિ અને ઈ-કોમર્સના વધતા ચલણના કારણે આ વખતે વેચાણમાં 40 ટકા સુધી ઘટાડો જોવા મળશે.

વધુમાં વધુ 2,000 કરોડનો વેપાર થવાની આશા

ગુજરાત ગાર્મેન્ટ મેન્યુફેક્ચરર્સ અસોસિએશન (GGMA)ના અંદાજ પ્રમાણે, રાજ્ય અપૅરલ (કપડાં) ઈન્ડસ્ટ્રી માત્ર નવરાત્રિ અને દિવાળીની સિઝનમાં જ 4000 કરોડ જેટલી કમાણી કરે છે. GGMAના પ્રમુખ વિજય પુરોહિતે કહ્યું કે, “દર વર્ષે તહેવારોના દિવસોમાં સેલ્સ રેવન્યૂ લગભગ 3,500-4,000 કરોડની વચ્ચે રહે છે. ત્યારે આ વર્ષે આ આંકડો વધવાને બદલે ઘટ્યો છે. આ વર્ષે સમગ્ર ગુજરાતમાંથી વધુમાં વધુ 2,000 કરોડનો વેપાર થશે.”

ઉત્પાદનમાં કાપ મૂક્યો

માગ ઘટતા ગાર્મેન્ટ ઉત્પાદકોએ આ વર્ષે ઉત્પાદન પણ ઓછું કર્યું છે. શહેરના પોશાક ઉત્પાદક અર્પણ શાહે કહ્યું કે, “ઓછા વેચાણને પગલે ઘણા બધા મેન્યુફેક્ચરિંગ યુનિટ્સે આ વખતે ઉત્પાદનમાં લગભગ 30 ટકા જેટલો કાપ મૂક્યો છે. વધતા ફુગાવાના કારણે લોકોના હાથમાં તહેવારો પાછળ ખર્ચ કરવા માટે પૂરતી રોકડ નથી.”

ઓનલાઈન શોપિંગથી ફટકો પડ્યો

હોમ અપ્લાયન્સીસ અને ઈલેક્ટ્રોનિક્સના હૉલસેલ અને રિટેલ વેપારીઓનો દાવો છે કે, ઓનલાઈન માર્કેટના કારણે તેમનું વેચાણ ઘટ્યું છે. રિલિફ રોડ ઈલેક્ટ્રોનિક્સ રિટેલર્સ અસોસિએશનના ઉપપ્રમુખ સુનિલ મોટવાણીએ કહ્યું કે, “ઈ-કોમર્સ પ્લેયર્સના કારણે અમારો ધંધો નબળો પડ્યો છે. ઓનલાઈન વેચાતી પ્રોડક્ટ પર જેટલું ડિસ્કાઉન્ટ મળે છે તેટલું રિટેલ દુકાનદારો નથી આપી શકતા. જેના કારણે ગ્રાહકો ઓનલાઈન શોપિંગ તરફ વળી રહ્યા છે. વેચાણ 60 ટકા જેટલું ઘટતા ટ્રેડર્સે વધારાનો સ્ટોક પણ રાખ્યો નથી.”

કેમ ઘટી ખરીદશક્તિ?

ટ્રેડ એક્સપર્ટના મતે વેચાણ ઘટવાનું મહત્વનું કારણે છે લોકોની ઘટી રહેલી ખરીદશક્તિ. ગુજરાત ટ્રેડર્સ ફેડરેશન (GTF)ના પ્રમુખ જયેન્દ્ર તન્નાએ કહ્યું કે, “પેટ્રોલ-ડીઝલ સહિતની જરૂરિયાતની વસ્તુઓની કિંમતો વધી છે. જેના કારણે લોકોનું માસિક બજેટ ખોરવાયું છે અને વાપરવા માટે ખૂબ ઓછી રકમ બચે છે. સ્ટોક માર્કેટ તૂટતાં રોકાણકારોના રૂપિયા અટવાયા છે. આ પ્રકારના વિવિધ કારણોસર ગ્રાહકોની ખરીદશક્તિ ઘટતાં ટ્રેડર્સની આવક પર અસર થઈ છે.”

આ પણ વાંચો : જાણો દુનિયા ના આ 5 મોટા અરબપતિ દર મહિને પોતાની સિક્યુરિટી ઉપર કેટલા રૂપિયા ખર્ચ કરે છે.

તમને કદાચ ગમશે

Loading...